Gonvllik Chitt 2018-2019

ARCHDIOCESE
OF
GOA AND DAMAN

PATRIARCHATE OF THE EAST INDIES

Archbishop’s House,
P.O. Box No. 216
Panjim – 403 001
GOA – INDIA
Tel: (0832) 2223353, 2225291
E-mail: archbpgoa@gmail.com

CP-Past/164/2018

Gonvllik Chitt
Gõy ani Damanv Mha-dhormprantachea
Yadnikank, Dharmikank, Loukik Bhavarthiank
ani Borea Monachea Mon’xank

“TANNEM MHAKA OBHIXEK KELA
GORIBANK BORI KHOBOR DIUNK” (Luk. 4: 18)

Pritichea Bhoinni-Bhavamno,
Devan dil’lea hea novea Gonvllik Vorsant tumkam soglleank Somia Jezuchea nanvan mayemogan noman korun hi Gonvllik Chitt pattoitam.

PROSTAVNA

Gel’lea Gonvllik Vorsa, Sthanik Povitr Sobha koxi, ami soglleamni kherit bhaxen amchê Somajik Zobabdarecher niyall kela; hi zobabdari dor ekleachi ani teach borabor soglleamni – zaum kuttumbant zaum somudayant zaum somazant – sangatan pallpachi mhunn voros bhor, hea ani tea somoyar, ami ugddas kela. Ti monapasun pallunk Kristacho mog amkam thar dinam mhunn amkanch dhiraun, hanga-thoim somajik huskean bhorlolim sakar panvlam ami marleant. Hea vorsa, toch vixoi odikui nettan ani bariksannen dhorchea monan, amche modem goribi vosta ticher amchem lokx ghalunk ani amchea gorib bhav-bhoinnink odikui sufoll adarachim amchean koxem zaum yeta tacher niyall korunk vavrum-ia.

“… Goribank Bori Khobor diunk, koidiank suttka porgottunk, ani kudd’ddeank portun nodor diunk, zulumak sampoddloleank soddounk ani Sorvesporachea upkaranchem voros porgott korunk Tannem mhaka dhaddla” (Luk. 4: 18-19). Nazaretchea devsthanant Povitr Purannantlim him utram vachun, Somia Jezun aplea jivitachem kar’ia spoxtt kelem.

Tor oslem — goribank, koidiank, zulumak sampoddloleank suttka divpachem – kar’ia aplem khaxa kar’ia mhunn Jezu kiteak sangta kai?

Nazaretcho Jezu Devacho Put ani moniskullacho Soddvonnar mhunn ami sotman’tanv. Deva Bapan aplem Raj sthapunk taka sonvsarant dhaddlo. Jezu ek pois aslolo Dev porgottinam: Dev laginch asa, mon’xank bhettunk to yeta, apli rajvott gheun yeta: osli Jezuchi porgottnni ani vhoddleantli vhodd Bori Khobor; karann Dev xim’ naslolo Kaklutsar Mog, ani tachem raj mhunnlear mon’xank patkantli ani sorv vaittantli suttka dita ani tankam subham’ jivit, xanti ani sukh haddtta toslem.
Itlench mhunnun somponam. Jezu dakholl korta to Sorgincho Ab’ba-Bap Jivitacho Dev, subham’ jivitacho Dev. Hea sonvsarant dor monis subham’ponnim jiyelolo taka zai: hi tachi mull-khuxi. Sant Irinev sangta tea pormannem, “Devachi mhoima mhunnlear subham’ponnim jiyetolo monis.” Punn amche modem gorib, chidd’ddailolim, degek poddlolim ani onit bhogtolim mon’xam aso sor, subham’ jivitachi khobor amchean korunk zainam. Dekhunuch Devachem Raj poile svater osleam osokt ani somazan chepoiloleam mon’xank (polle Iz. 61). Tancho jiv sonkoxttant asa ani virun veta dekhun Dev tankam churchurta, tancho kherit mog korta, tankam vinchun kaddtta. Mon’xanche onitik lagun chidd’ddailolim ani gorib mon’xam asat dekhun, Niticho Dev tanchi rakhonn korta ani tankam nit diunk fuddem sorta. He porim Suttkecho Dev tankam suttka dita, jivit dita. “Goribacho jiv vanchta tea mapan Devak mhoima melltta,” oxem El Salvador-cho rogt-govaiki dilolo Arsebisp Oscar Romero mhunnttalo. Mhunnttoch Povitr Pustok dakholl korta ani Somi Jezu porgott’tta to Dev kheritponnim goribancho husko dhortolo Dev.

I. GORIBANCHI KALLJI GHETOLO DEV

1. Soddvonnechea Itihasacher nodor marum-ia. Ejiptant Faraoh raj choloitalo ani Faraoh-cho dev Ejiptkarancho dev aslo, lokak chidd’ddaunk ditalo toslo dev. Bhonvtonncheam rajeanche-i bi toslech onit manya kortole dev asle. Punn Sorvespor Dev oronneant Moizesakodde uloita ani Ejiptant gulam’ponn bhogtoleank churchurun mhunntta: “… Ejiptant Mhoje porjechem dolldirponn Hanvem pollelam ….. tinnem mhaka ulo marlo to Hanvem aikola. Tika Ejiptkaranchea hatantli soddounk Hanv ailam ani … Israelachea putam-dhuvank Ejiptantlim bhair kaddunk Hanv tuka Faraoh-xim dhaddttam” (Sutt. 3: 7-10). “… Hanv tuje borobor astolom…” (Sutt. 3: 12). “…Israelacheam putam-dhuvank tunvem oxem sangunk zai: ‘ZO ASA Hannem mhaka tumche-xim dhaddla’ ” (Sutt. 3: 14). YAHWEH hea nanvacho orth mhunnlear Suttkecho Dev koso Hanv tumchea sangata asam – oxem zannar sangtat.
Korar sthaptanam ani Dha Updes ditanam Dev portun mhunntta: “Hanv Sorvespor tumcho Dev. Hanvench tumkam Ejipt desantlim, gulam’ponnachea biraddantlim, bhair kaddlim. Mhoje bhair tumkam anik dev asche nant” (Sutt. 20: 2-3). He porim survatekuch thaun Sorvespor cheploleanchi kallji ghetolo ani tankam suttka ditolo Dev koso dixtti poddtta.

2. Israel porje kodde Devacho Korartanche modem niticher ani bhavponnacher dhorlolo Novo Somaz upzoita (polle Sutt. 16: 19-21; 18: 11-26; Lôk. 33: 54; Josh. 13: 21). Dusre Vatikani Sobhechea eka dakhleant ami oxem vachtanv: “Goribanchi poristhiti Korara add vetoli ek onitichi poristhiti. Haka lagun Korarachi Somurt tankam kaideam vorvim alaxiro dita. Jea Devan Izraelak Ejiptantlea gulam’ponnantli soddoiloli tea Devachi dixa hea kaideam vorvim tankam disunk lagta. Lhanam ani goribam sovem onit korop mhunnlear gombhir patok ani hem patok Deva sovem aslolo ekchar moddun uddoita” (LG 46). “Mhunnttoch, Devache bhozonnecher ani mogachi sfurti gheun niticher ani somurticher adarlolea somazachem kolpon ani ruprexa (outline) adinch thaun asa” (LC 45). Povitr Pustok ugddun vachum-ia: Sutt. 2: 20-24; D.S. 23: 16-17; 24: 14-15.19; Lev. 25: 23-34).

3. Bhasailolea Desant Israel porza survatek raza nastanam nitin-bhavponnan jiyeunk vavurli. Porjen Raza magun ghetlo tednam, tannem girestkayek ani podvek bhulonastanam lokachi chakri ani goribancho samball korunk zai aslo (polle St. 72). Punn oxem ghoddlem nam. Raza-kunvor zaite pavtti kuddeam devank man’tale ani teach borabor broxttacharachem ani onitichem raj choloun, goribank chidd’ddaitale. Tednam Devache Provadi dixtti poddunk lagle; razank ani tech porim somazak te xiddkaitale ani, poile svater, lokan goribank nit, doya ani bhavponn dakhoil’lim Devak zai mhunn porgott’ttale (polle Jer. 22: 1-5; Am. 6: 4-6; 8: 5-6; Mik. 3: 9-12; Iz. 10: 1-4; 11:1-9; Jer. 7: 1-5). Provadiam pormannem goribank onit korop mhunnlear Devak vollkhonam zavop (polle Jer. 22: 13-16; Hos. 4: 4-6) ani kuddeam devank bhozop (polle Hos. 6: 6; Am. 5: 21; Iz. 1: 11-17; 43: 23-24; Jer. 6: 18-21; 7: 4-7).

4. Jeruzaleachea Devmondirant lok Stotram vaportalo. Yahweh osoktancho, kheritponnim goribancho, porkeancho, randd bailancho ani onath bhurgeancho Dev mhunn thoim spoxtt zata. “… dhumallo bhogtoleam khatir To nit korta, bhukel’leank To giras dita, koidiancheo sanklli Sorvespor toddun uddoita. Sorvespor kudd’ddeanche dolle ugoddta, bagovloleank nitt ubim korta. Sorvespor porkeank rakhta, onath bhurgeank ani vidvank samballta” (St. 146: 7-9; polle St. 94: 3-7; 37: 14-17; 22: 23-27).
Zannvayechim Pustokamdurbollkai mottem vaitt mhunn dakhoitat; dusre vatten, girestkai soglleam-on vhodd ani bori vost nhoi, hem-i bi spoxtt kortat. Goribanche hokk Devache hokk, Tachem kar’ia tanche hokk rakhunk. “Osoktancher zulum’xai korop mhunnlear Rochnnarak okman, Gorjevontam thaim doyallponn Rochnnarak bhovman dita” (Mhonn’nneo 14: 31).
Attapun: Adlea Korarant, Dev amkam apunn gulamank soddovpi ani goribank rakhpi mhunn apli vollokh korun dita ani mon’xamni apnnacher bhavarth dovrunk ani pelea sovem nitin vagunk hukum’ ghalta. Nitiche kaide pallunuch Dev zulum’ bhogtoleancho soddovpi mhunn khoreponnim vollkhunk melltta” (JW 30).
Mogall bhoinnimno ani bhavamno, soddvonnechea itihasant apnnachich vollokh korun dilolea khorea Devache sodik porot vochum-ia. Nit ani korunnai ami vevharant ghalinanv zalear ani amchea peleachê purai soddvonne khatir udarponnan ami hat-bhar lainanv zalear Devachim khorim bhurgim amchean zaunk zainam mhunn amche bhitor khatri vaddunk zai.

II.JEZU GORIB ANI GORIBAM KHATIR

Jezuchea kallar Palestinant zaiti onit vostali. Thoddeam girestam ani podvedaram khal khup lok goribi bhogtalo. Xidav ani dhondd khor asle, zaito lok rinnant poddttalo, xetam-bhattam soddun diunk poddttalim. Zaitim zonnam rostear poddttalim, bhik magtalim, aplea udarposonna khatir kuddi-dhondo porian korunk pavtalim. Romi odhikari dharunnayen raj choloitale. Dhormxastri ani Farizev Moizesache Somurticher mitt-mirsang ghalun lokacher naka zal’le bhar ghaltale ani zaiteank ‘patki’ ani ‘boxttovlolim’ mhunnun bhairaitale. Eka utran, Jezuchea kallailo somaz onitin ani vegllocharan bhorlolo aslo.
Nazaretchea Jezun osle somajik poristhitik dolle dhampunk nam, punn kalljidarponnan tika fuddo kelo. Goribam ani degek poddloleam khatir mull-pasanti (fundamental option) taka asli, tanchech modlo eklo koso to jiyelo, tanche khatir bharim vavurlo ani zhuzlo ani tankam Devachea Rajeachi suttka porgottli (polle SDS 7, 8, 39, 41, 172). Xekim apunnuch bhairail’lo ani chidd’ddailolo monis koso to melo.

1. Jezuchi Porgottnni. Jezu goribank Devachea Rajeachi Bori Khobor, mhunnge, tanchi suttka porgott’tta (polle Luk. 4: 18-19). ‘Gorib tim, atam bhukeleant tim, atam rudon kortat tim tumi subhagi,’ mhunntta Jezu (polle Luk. 6: 20-26), ‘karann Devachem Raj yeta, tumchi suttka lagim pavlea, tumchi dukh-khont sompunk veta, novo somaz udeun yeta!’

Jezu suttkechio kornnio adarta ani Juanvachea sondexkarank sangta: “Tumi pollelam ani aikolam tem vochun Juanvak sangat …” (Luk. 7: 22-23; polle Mt. 11: 4-6). Jezuchi anik ek porgottnni mhunnlear, goribam sovem Dev asa mhunnpachi: “Mhojea lhanantlea lhanam bhavam-bhoinnim modlea ekleak jem tumi kelem, tem tumi Mhakach kelem” (Mt. 25: 40). Devachea Rajeant bhitor sorunk mon-jivit bodlunk zai. “Zoso tumcho Bap doiall, toxinch tumi-i doiall zaiat” (Luk. 6: 36). “… Tumchean Devachim ani borobor Girestkayechim gulamam zaum nozo” (Luk. 16: 13; polle Mt. 6: 24). Girestkayecho dev Devachea Rajeachem bim kirlunk dinam, punn tem damun dhorta (polle Mt. 13: 22). He porim girest mon’xak taronn zoddunk bhov kotthin, suyechea bidd’ddeantlean hoti vochunk odik sompem (Mt. 19: 24). Anik eke kodden Jezu xiddkaita: “Chotrai dhorat ani dhon-girestkaiechi axea sarkich soddun diat …” [Luk. 12: 15; polle Girest monis ani Lazar – hanchi vopar (Luk. 16:19-31)]. Borea Samariekarachi dekh ami gheunk goroz (polle Luk. 10: 25-37).

2. Jezuche Nixedh. Palestinant Judev-raj Devachea nanvan choltalem. Podvedar pongodd barik lokacher bhorpur onit-vegllochar adartat ani hem Devachea nanvan kortat; dekhun Jezu khupuch khontovta ani nixedh marta:

(a) Girestancher: tanche onitik lagun tancher formonn poddttolem (polle Luk. 6: 24-25; 16: 9-11.19-31);
(b) Dhormxastriancher ani Farizevancher:te dhongi, patkiank kikont korpi, lokacher zodd ojim ubarpi, randd bailanchim ghoram khavpi, dusreank vatt dakhovpi kudd’dde (blind guides) (polle Luk. 11: 45-46; 18: 9-14; Mt. 21: 28-32; 23: 4.16-26).
(c) Mha-Yadnikancher: tannim devmondir boxttailam, vegllocharachem hatiar ani choranchi dhol korun soddlam (polle Mt. 2: 23 — 3: 6; Mk. 11: 15-18).
(d) Rajkornnik Vhoddilancher:te zobordosten raj choloitat, lokak chidd’ddaitat (polle Mt. 20: 25; Mk. 10: 42; Luk. 22: 25-26).
He porim Jezun nhoich chuktolea mon’xanchi, punn teach borobor, ugteponnim nhoi zalear guptim, patki bandavollinchi-i ttika keli. Nixedh marun hem dakhoilem; ani amkam, nit samballun, vegllochar sompoun ani podvi goribanchea faideak vaprun, Devachea rajeak yevkar diunk xikoilem.

3. Jezuchem Suttke-Kar’ia. Jezuchem akhkhem jivit Devachea Rajeak bhettlolem. Tem poile svater goribank Bori Khobor, mhunnge, tanchi poripurnn suttka. Apunn gorib zaun, Jezu moro porian goribanchi ani chidd’ddailoleanchi rakhonn korta ani patki, donddvosuldar, naikinni, koddkar, kudd’dde, bhere, mone, langdde, boxttovlole, devcharachea tabeant aslole, porke, gorib, barik-nennar lok – hankam soglleank yevkar dita.
Jezuchem pekovnnechem ani devchar-kaddpachem kar’iavaitt sokteancher zoit ani Devachea Rajeachi suttka khunnaita. Jezuchim bhogsonnea-kortubam ani patkeam borabor jevnnam Devacho kherit mog porgott’ttat ani somajik bhairavop sompoitat. Jezuchi chal koddkaram (polle Mk. 1: 40-45; Luk. 5: 12-16; 17: 11-19), Samariekaram (polle Luk. 10: 33-37; 17: 11-19; Ju. 4: 39-42) ani ostoream (polle Mt. 15: 28; 21: 31; Luk. 7: 37-47; 8: 1-3; 13: 16; 18: 1-7; Ju. 4: 7-27) sovem tea kallar bhov athvi, punn jerul manachi (polle MD 12-16).
Jezun kosloch vegllochar korunk nam. Devachea Rajea khatir suttkechem kar’ia chalu dhorun, tannem Novea Somazachi bun’iad ghatli. Oslea somazant svotontrtai, eksarkeponn, kallza-mona ekvott (solidarity), goribam khatir pasanti (option for the poor), aspavnni (inclusiveness) ani priti-sevek lagun teag porzollunk zai.
Jezu somajik vo rajkarnnik vavraddi koso nhoi, punn Devachea Rajeacho ut’tom Provadi koso dixtti poddlo. Dekhunuch oniticho somaz tannem haloilo ani podvedaramni taka khursar marlo. Punn Sorginchea Bapan taka ubarlo (polle Fil. 2: 9-11). Taka punorjivont korun, Bapan aplea Puta Jezuchem sogllem kar’ia thirailem. Dev khorench goribancho Dev: Jivitacho, Niticho, Suttkecho Dev To. Devache Rajvottkent soglleamni ekamekachea manan, mogan ani kallza-mona ekvottan jiyeunk zai; ani osoktam-goribancho kherit poramus korunk zai. Oniticher zhuz mhunnlear khorea Devachi bhokti; onitichi chal dhorop vo onitik dolle dhampop mhunnlear khorea Devak nakarop. Jezu, Devachea Rajeacho chakor, dor mon’xachi ani somazachi poripurnn suttka haddpachea kariak khand marunk amkam apoita. Hea kariant goribam khatir pasanti gorjechi.
Punorjivont Jezu mon’xakullacho Bhorvanso. Itihasacho Dhoni koso, Povitr Atmea vorvim mon’xancho itihas to Devachea Rajeache dixen choloita ani eka disa Jivitache bhortek to pavoitolo. Amchem visvasan bhorlolem, khotkhotit magnnem zaum-di: “Bapa, Tujem Raj amkam yeum!”
Bhoinni-bhavamno, amcho mogacho Fransisk Pap Saib ami soglleamni Jezu Krista lagim ek khasgi sombond zoddcho ani to chukoinastanam dispott’ttim zoddit ravcho mhunn amkam agro korta (polle EG 3). Jezu amchea Guruk ani Nomuneak dispott’ttim ami sodun kaddum-ia ani tache sovem amcho sombond thiraun, tache visvaxi xis koxe amchea somazant taka sakxi dium-ia.

III. GORIBANCHI KALLJI GHETOLI POVITR SOBHA

Soddvonnechea Itihasant dixtti poddlo to Dev goribanchi kallji ghetolo Dev, goribam khatir kherit pasanti aslolo Dev. Jezu somestancho Soddvonnar, torui to poile svater goribank Bori Khobor zalo. Povitr Sobha dubhavaviret goribanchi zaunk zai, tika jerul goribam khatir pasanti asunk zai. Fransisk Pap Saib mhunntta: “goribanchea ani somajik nitichea huskeantlim ami sutt’ttanv mhunn amche modlea konnench chintunk zainam” (EG 201).
Don hozarvea Utsovik Vorsant, Indiechea Katolk Bispamni mhunnlolem: “durbollkayen, vegllocharan, onitin ani zulum’ponnant jiyetolea amchea lokachem jivit bodlunk ami nixttayen vavurtoleanv …. ani amchea akhkhea apostolik kariant goribam khatir pasanti ek prathmiktai (priority) koxi astoli.” Teach vorsa Indiechê Povitr Sobheche Samania Sobhen mhunnlem: “Somiachea panvlamni cholun, amchea desantlea deger uddoiloleam ani goribam khatir pasanti asloli Povitr Sobha zaunk ami vavurtoleanv ….. ami osoktank ani zulumank odhikar dilea bogor tharchim nanv” (YKJ 2000 Final Statement, 32). Amchi khaxeli Dhormprantik Porixod (Diocesan Synod 2002) oxem sangta: “Soglleo gonvllik kariavolli manddun haddtanam, amchea bhavarthacho somajik bhag dixtti poddchi goroz asa: dublleam sovem amcho mog, durbolleank amchea jivitant poilo-vhoilo zago divop, adi” (SDS 176). “Povitr Pustokachea, Sevadhormachea ani Dotornichea vavrant provadik dixa asunk zai. Hi dixa dhorlear goribam khatir nivodd asun somajik vavr korunk margdorxonn mellta” (DPP 5.5).

1. Goribam Khatir Pasanti – hacho Maz Somi Jezu ani tacho Bap (Christ-centred / God-centred Option for the Poor). Amchi goribam khatir pasanti Kristi bhavarthacho foll. Somi Jezu dulobayeche chollvollek (revolution of tenderness) ani somestanchea kallza-mona ekvottak (solidarity) amkam apoit asa. Ami soglleamni ek novem mon apnnaunk zai, “jem sonvsaracheo vostu apleo korche svater, somudayachem ani soglleanchea jivachem poile svater chint’ta” (EG 188). Kallza-mona ekvott mhunnge ‘somestanchem ani poile svater goribanchem boreponn haddtta tosli seva korunk ghott ani thir khuxi’ (polle SRS 38 ani 46).

Somia Jezuk nhoich goribam khatir pasanti asli, punn ek motto Deva-gutt tannem amkam ugto kelo: “jem tumi mhojea lhanantlea lhan bhava-bhoinnik kelem tem mhaka kelem” (Mt. 25: 40). Goribam sovem Jivo Dev, Jivo Jezu kheritponnim asa ani amkam ulo marta. “Jezu, amchea mogak taneun, goribanchea rupan amchea kallzachea darar marta. Amchea udasponnacher (indifference) ami zoit vhortanv ani, Jezuchea nanvan, lhanantlea lhanank amchich bhett ami kortanv tednam, ami tachim borim ani visvaxi ixttam zatanv, zanche borobor jiyeunk to sontosta” (Pap Saib Fransiskachem provochon, 19-11-2017). Goribanchea moga viret Devacho mog nam, Devachem taronn nam. “Tanche osoktayent soddvonnechi ek sokti asa ….. tim amkam sorginchi vatt ugoddttat, ami sorgar pavunk tim amchi passport” (voir ul’lekh kel’lem provochon). Mhunnttoch amchi goribam khatir pasanti Devacher, Jezu Kristacher dhorloli pasanti; tantuntlean amchea somajik kariant Devak ami onnbhovunk zai (contemplation in social action). Bhoinni-bhavamno, hem dennem ami Sorginchea Bapa lagim khotkhotean magun gheum-ia!

2. Goribam Khatir Pasanti: Mon-Jivit bodlunk Ulo (Call to Conversion). Goribam sovem jivea Devak ami fuddo kortanv; tanche sovem amchem mon-jivit bodlunk To amkam kheritponnim apoita. “Amkam xikounk tanche lagim zaitem asa. Nhoich timsensus fidelium hantunt vantto ghetat, punn tanchea avghoddayamnim koxttovtolea Kristak tim vollkhotat. Tim amkam Xubhvortoman porgott’ttat taka ami aitim asunk favo. He toren tanchea jivitant taronnik xokti asa ti ami vollkhun, tankam ami Povitr Sobhechê yatrechea mazant ghalunk zai” (EG 198). Kristi mon’xachi toxench Povitr Sobhechi Novi Chal (New Way of Being Christian/of Being Church) goribam khatir pasantintlean suru zata. Kristi monis toxench Kristi somudai goribamxim ‘poltodd martat,’ tanchea jivitant rigtat ani kallza-mona ekvottan tanchi seva kortat tednam, Bhagianchi vatt tim cholunk lagtat. Goribanchea jivitant rigop mhunnlear adlem mon ani chal soddun divop; khaltikai, goribi, teagi jivit apnnavop (polle LG 8), novi dixa zoddop, goribanchem monisponn, vorteponn, somaz bodolpachi sokti vollkhun ghevop, khursail’lea Jezuk hajir kortoleank manan lekhop, tanchekoddlean xikunk toyar asop ani tanche lagim khol ekcharan jiyevop. Oslem mon-jivit bodlop sodanch chalu asunk zai: gorib Jezuchea toxench goribanchea ekcharan ami vaddot vochunk zai. Bhav-bhoinnimno: goribam sovem amkam Devacho onnbhov ani mon-jivit bodolpachi kurpa magit ravum-ia. Goribam khatir pasanti vistarun Jezucho niz pattlav korunk xikum-ia.

3. Goribam Khatir Pasanti: Xubhvortomanik Durbollkayek Apovnnem (Call to Evangelical Poverty). Jezu nhoich kallzan gorib, mhunnge Deva Bapak purteponnim khalto-bhettlolo ani sonvsarache axe mekllo; punn chalint gorib, goribam sovem sarkoch ek zalolo ani tanchea kallza-mona ekvottan jiyeta ani vavurta toslo.
Xubhvortomanik durbollkai eke vatten Devacher purai visvas khunnaita zalear, dusre vatten axechi ani gorvixtt apleponnachi tallnni poisaita toslem khor (austere) ani xant jivit khunnaita (polle 1 Tim. 6: 7-10); teach borobor, goribam sovem kallza-monacho ekvott somajik bondhon (social commitment) utpon’n korta.
Amchea khasgi ani kuttumbik jivitant koxe porim ami Xubhvortomanachi goribi jiyeunchi — hacher lokx ghalum-ia ani tea sombondim novim panvlam marunk vavrum-ia. Hispabhair duddu moddop, noveo-noveo vostu vikteo ghevop ani haka lagun upkartat tosleo vostu legun bhair uddovop — oslea chalincher chotrai dhorum-ia. Kazarank-porbank aiz-kal khub duddu moddttat. Amchio somarombhnnio odik sadheponnan korunk ani niti add vetat toslea somajik chali ani porompora bodlunk proyotn korum-ia. Kristi jivit kallza-mona ekvottan vanttpachem jivit (life of sharing). Amcho vell, amche gunn, amchi girestkai udarponnan vanttpachi chal dhorum-ia. Amchem dan vo seva antr-poirean nhoi, punn neamit (regular) korunk vavrum-ia.

4. Goribam Khatir Pasanti: Somajik Nitichea Kariak Apovnnem (Call to Action for Social Justice). Goribam khatir pasanticho mukhel prokar (quality) mhunnlear zagrutayen ani xitaben goribanche suttke-hetu amche korop ani te sakar korunk pott’ttidken vavrop. Goribichem mukhel karann mhunnlear somajik onit. Goribam khatir pasanti mhunnlear somajik nitichi pasanti. Amchea somazachea bandavollimni zaiti onit bhitor sorlea. Oxem zal’lean, amche modem niticho-bhavponnacho somaz ghoddun haddunk somajik nitichem zhuz vo suttke-kar’ia gorjechem. Fransisk Pap Saib Benedit Pap Saiban adim uchcharlolim utram aplim korta: “Povitr Sobha nitichea zhuza bhair ravunk xokonam, nhoi mhunn favonam” (EG 183). Amche Dhormprantik Porixoden mhunnlolem asa: “Loka modem zagrutai haddpachem kam’ ani mon’xam-hokk rakhpachea ani somaz bodolpachea vavrak fuddem kaddpachem kam’ amchea somajik kariacho mukhel usko zauncho. Hi chal amche Kristi akarnnecho ek mukhel bhag zatolo” (SDS 184.2; polleDPP 4.3.1.).

Povitr Sobhechem suttke-kar’ia heo vostu attapta: mon’xanchea jivitachi ani hokkanchi rakhonn, provadik nixedh, goribank aplea proyotnamni ani zhuzamni sangat-tenko, bhagianchem mon tankam divop ani tancho bhorvanso thiravop. Goribam khatir pasanti folladik zaunk ani niticho-bhavponnacho somaz upzunk lokachio Somajik Chollvolli ani Bandavolli (Social Movements and Organisations) gorjechio: tankam Povitr Sobha tenko dita ani Xubhvortomanan uzvaddaita. Hea suttke-kariant amchio Firgozoani amcheLhan Kristi Somudai gul zaunk zai. ‘Tim sonvsarak ani tacheam prosnank ugtim asunk favo … ho somajik husko firgojentuch uronk zainam, punn akhkhea prantak ani desak pavunk zai’ (polle SDS 184.1). PokxancheaRajkaronnantloukikamni vantto ghetlear borem, punn chomcheagiri pois dovrun, ontoskornn suchoita tea pormannem tannim vantto gheuncho. Lokraj thiraunk zai ani, dusre vatten, rajkarbhar sudraunk zai. Somajik nitichem mon nibel gorjechem; tech porim broxttacharacher add zhuz.
Dusri Vatikani Vixv-Sobha zal’leak Povitr Atmean Povitr Sobhek goribam khatir pasantichea ani somajik nitichea margar khub fuddem kaddlea ani kaddit asa. 2002 vorsa zal’lê amche Dhormprantik Porixoden hacher zaito nett ghal’lo asa. Tichea Dakhleant oxem mhunnlam: “somajik nit amchea bhavartache porgottnnecho sopurnn bhag ozun zauncho asa. Amchea bhavarteam modem niti vixim ozun nischit mot roch’chem asa, amchea somudaiamnim ani sonvsthamnim somajik nit ozun pallchi asa. Hem korunk amchi chal ami sam’ki bodlunk zai; he soglle prosn xikloleam bhaxen nhoi, punn goribanche nodren ami polleunk favo” (SDS 177). “Ami sogllim, Iadnik, Mottvaxi ani Loukik bhav-bhoinnimnim dublleam sovem amcho kherit mog dakhounk favo. Hem poile suater amchea khasgi jivitant, somazant ani amchea sonvsthamnim dixttti poddunk favo” (SDS 76).
Tor, pritichea bhoinni-bhavamno, amchi Gõychi Povitr Sobha odik ani odik goribam khatir vavurtoli zaunk ondunchea Gonvllik Vorsa kherit proyotn korum-ia.

IV— POVITR SOBHECHEM SOMAJIK KAR’IA

1. Bharotant Goribichi Poristhiti
i) Khor Goribi. Bharotant sumar 22 ttok’ke lok hispabhaili bhuk bhogun jiyetat: hi sodanchi poristhiti zalea. Goribam modem bhurgeanchi got odik gombhir. Akhkhea jogant torekvar goribi bhogtolim bhurgim asat tantlim 30% Bharotant asat mhunn Global Multidimensional Poverty Index – hantuntlean kolltta. Amchea Bharotant khor goribi ek sot zalear, dusre vatten 73% desachi dovlot 10% lokanchea tabeant asa! Hachem karann hispabhaili onit mhunnlear chukichem zaunchem nam.
Hea sondorbant, Caritas-India aplea sobar prokolpam udexim Bharotant goribi unni korunk thoknnai korpa sarko vavr korit asa.
ii) Mon’xache Hokk Maddovop. Udorgotichea nanvan lokachim bhattam ani ghoram nam korun tankam ubott ghatleant. “Udorgoticho poilo gulam’ mhunnlear gorib monis,” oxem Fransisk Pap Saib sangta. Goribanche hokk maddovunk sompem, karann tancho avaz uttovpi bhov thodde. Az-kal amchea Bharotant eke vegllech torechem varem marta, zhoim ekech torechem jevonn, nhesop, chal ani dhorm pallunk zai mhunn avaz gazta, soglleamni ekech sonskrutaye khal jiyeunchem mhunn nare ghaltat. He toren mon’xanchea hokkancher dhopko poddtta ani lokxayecher guri poddunk laglea. Veg-veglleo lhan sonkhia (minorities) aple surokxe khatir bhiyeun asat. Thoddkean, Bharotant kaideak man khub unno zaunk lagla.
iii) Amche Ghottnnecher Akant. Vechnnukam vellar sobar asvasonnam diun umedvar khub lokachim monam guspaitat. Ani lok zaite pavtti kosleai holkea faideak lagun aplem moladik mot vikun dita. Aiz amche Ghottnnecher akant aila ani haka lagun choddan-chodd lok osurokxit zala. Ho husko monant dhorun, halinch zal’le tiche zomatint, Bharotachea Bispanche Porixoden Bharotache Ghottnnechim muliam — mhunnlear soglleam nagrikanchem eksarkeponn, ugteponnim ulounk ani ap-aplo dhorm pallunk sot’tea – ami soglleamni samballchim ani rakhchim mhunn jahir kelam. Hea sondorbant akhkhea Bharotant 2019 vechnnuko zaunchio asa tea nim’tan Ghottnechi odik khol som’zonni gheun ti rakhunk ami vavrunk zai (polle CBCI XXXIII General Body Meeting Final Statement 2018).

2. Gõyant Goribichi Poristhiti
Zannaranche xikovnne pormannem, gorib zaun asa zo torekvar jin’samni unneponn bhogta. Hem unneponn zaum yeta duddvam vatten, bhavnnam vatten vo bahirkara (ostracism) vatten. Duddvamni xrimont asa mhunn monis girest zainam; toch monis somazan bhairail’lo zaum yeta; kivam duddvanchem unneponn bhogtolo monis bhavnnamni girest ani mhatmik asunk xokta. Oxem astam, ami sogllim kosle nam kosle toren gorib! Hea nim’tan ami Gõycher nodor marit zalear amkam veg-vegllea jin’sanchi goribi dista. Hea amchea niyallant tantlea tin jin’sancher nodor bhonvddaum-ia.
i) Duddvam vatten Goribi. Bhailean sogllem borem cholta oxem dista mhunn Gõyant bhov thoddo lok gorib asa mhunn goir somoz asum yet. Ghoddie Bharotachea heram prantam borobor zokhlear Gõyant hispabhaili bhuk nam zait, punn zaitim zonnam aplea dispott’ttea girasak sadhea-chaltea vostuncho unnav bhogtat.
Tea bhair zaitim bhurgim ani tornnattim, aplea ghorcheamkoddlean duddvancho adar nam zaun, fuddlem xikop korinastanam urtat vo poixeank lagun bigoddlole bolaikechi niga gheunk fattim ravtat vo svotachem ghor nam mhunn khont kaddttat. Amchea Gõyant zaitim bhav-bhoinnim dhondeant fosleant vo uxnnem ghetlea uprant sarkinch trasant poddun, tantuntlim thoddim atm’ghat porian korunk pavleant.
ii) Bhavnnanchi Goribi. Monis zunvo nhoi; to heram sangata jiyeta ani vaddtta, tosoch tanchea vangdda somazantlea prosnank fuddo korta. Punn durdoivan, zaiteank dusream vangdda vaddpak kotthinn zata, tim ekmullim jiyetat. Apunnuch kuxin ravtat.
Anikui asat jim eka gorib ghorabeant zolmak yeun, heram vangdda misoll zaunk fattim sortat ani he toren jivit bhor unneponn bhogtat. Dusrim asat zanchea bhavnnanchea gondhollak lagun kaim monachea duensank sampoddttat ani somaza mukhar hinnponn koxem tim bhogtat. Zaitim bhurgim aple kuddicher bolatkar vo dusre bhaxeche opman bhogtat ani magir akhkhem jivit bhor ho ghav (trauma) tankam soddinam.Bhavnnanchea unneponna khatir zaiteank svotachea ghorant porian dhumallo vo bahirkar bhogcho podtta; nirbhagan, osli goribsann amche modem vaddot asa.
iii) Somajik Bahirkar (Ostracism). Svota ghor ani jevonn-nhesop nasun, thoddeank somajik bahirkar sonsunk poddtta, dusrim tankam bore nodren pollenant; osli goribi amche modem zaiti vosta. Veglle-veglle tiche sobhav!
Oxikxit asat tankam somaz nennar mhunn lekhta; zannttim vo duent asat tanchi goroz naslolea porim tankam polleta. Mornnadik piddent (terminal illness)asat toslim zaitim eksurinch aplo bharadik khuris vhortat. Opangull vo monachi zoddai aslolim somazachi orthik poristhiti hogddaitat, oslem chintop vaddot asa.
Gõyant khub lok dusrea prantanchea lokank (migrants), zompddeamni ravtoleank, rostear poddloleank nibor utramni uloitat ani tankam bhairaitat. Zati-katik lagun thoddea lokak jivit bhor unneponn bhogchem poddtta.
Onath bhurgim ani randd bailo aplea jivitant hinnponn bhogtat. Sirvis nastanam jiyetat toxench bhailea xharamnim vavr korun portoleant ani hanga padixer zatat tancheo-i khonti khub. Ghoramni vavr kortolim zaitim apli sirvis vochot mhunn ogeponnan onit bhogtat.
Bondkhonnint asat tancheruch nhoi punn tanchea akhkhea ghorabeacher eka krimidorachem chhap koxem poddtta ani hem chhap jivit bhor marlolea porim togta. Jim soreache vo gungi vokhdanche gulam’ zaleant tanchea ghorabeank zaitem unneponn sonsunk poddtta.
He toren anikui torechi goribi bhogtolim amchim bhav-bhoinnim astolim. Kheritponnim hea Gonvllik Vorsa tanche sovem amchem mon bodlunk ani tanche sodik vochunk amche mukhar ek mottem avhan ubem zata.

3. Osli Goribi Hatallpachea Kamant Amche Upai ani Kariakrom’
Durbollkayecho akar veg-vegllo mhunnttoch ami sobar toramni ticher akromonn manddunk zai. Bhukel’leank jevonn diun, tanel’leank piyeunk diun ani vattsurank biradd diun amchi zobabdari sompli mhunn amchean dhorunk zainam. Tim kiteak gorib, konnem tankam gorib poristhiticher pavoileant, kiteak tim thõisoruch urleant – osle vichear kelea bogor amcho somajik vavr ordkuroch urtolo ani gorib asat tim sodankal teach zagear urtolim.
Amche Gõyche Povitr Sobhechea veg-veglleam Khateamni aplea vorsavollichea odmaspotrant (budget) goribanchi niga korunk ek kherit bhag dovorcho. He vixim protiek Khatean, gombhirtayen mon lavun ani favo ti bhasabhas korun, fikirin upai gheunche mhunn mhozo khol anvddo. Hea Gonvllik Vorsa dor eka Khatean zata te porim konn gorib asat tim sodun kaddchem ani koxe toren tanchi poristhiti bodlunk zata tacher kherit lokx ghalchem mhunn mhoji khotkhotit vinovnni.
Somazache novsornne khatir amchim Khatim asat, je porim Caritas-Goa, Council for Social Justice and Peace ani Centre for Responsible Tourism; tannim poile suater veg-veglleam toramnim goribi bhogtat tankam adar-alaxiro pavounk odikuch thokos gheuncho. Tea bhair, lokak aplea somajik zobabdarechi odik mahiti mellounk, neamit novsornneche kariakrom’ ghoddoun haddche. Yadnikamni toxem loukikamni, aplea bhavarthachi somajik bazu odik kholayen somzun, odikuch zagrutayen jiyeunchem mhunn mhozo husko. Lokachea prosnamni sangat diunk ani tanche hokk rakhunk Gõyche Povitr Sobhecho vavr chalu asa to odikui nettan mukhar vochunk zai.
Anik ek mhunnlear amchea tornnattiank ap-aplo udeog-dhondo ghoddoun haddunk kherit sangat toso adar diunk amcho husko zaunk zai. Hantuntlean ami nhoich goribi hatalltoleanv punn borochbor noveo nokreo rochun haddttoleanv.
Amchea Dhormprantant goribam khatir khub vavr korpi Dharmikanchio Sonstha asat tanche khatir ami Devak argham diunk favo. Apnnakuch visrun, mogan ani fikirin lhanantlea lhananchi seva tim kortat tem polleun amchem kalliz dadosta! Loukik bhav-bhoinnim modem Visentin Sonsthechim vangddi kherit bhaxen goribank bhett diun, tanchea eksurponnant ani konixttayent vantto gheunk vavurtat ani tankam poixeam ani jin’sancho adar ditat. Tea bhair, apapim vo heram borobor, zaitim zonnam goribank pavunk ani tankam voir kaddunk vavurtat. Him sogllim Devachinch besanvam mhunnlear otitai zaunchinam.

4. Amchea Firgozamni Somajik Kar’ia
Hea Gonvllik Vorsa suru korun, amchea firgozamni gorib-dhaktteam khatir kherit bandavolli ghoddoun haddchi goroz asa. Goribam khatir zaito vavr ami kortanv tantunt khuxal zatanam, anikui amchean kitem korum yeta tea vixim amche dolle ani mon ami ugtim dovrunk zai; hea vixoyacher protiek Gonvllik Firgoz-Sobhen toxem firgojechea soglleam prexitayechia vibhagamni (apostolate units) bariksannen niyall korun, bhonvtonnchea mon’xanche koxtt lhovu korunk vavurchem mhunn mhojea kallzantsun vinoitam.
Dor eke firgojen ek Goribam Khatir Nidhi (Fund for the Poor) ghoddoun haddchi mhunn hanv kherit agro kortam. He toren, Povitr Atmeache sfurten goribanchea gorzank pavunk soglleamni thokos gheuncho.
Amchea Lhan Kristi Somudayamni bhav-bhoinnim koxe toren jiyetat ani tanchio gorzo koslio tacher bhavarthiamni odik lokx oddchem mhunn Community Animation Team (CAT) hanchea vangddiamni bhar gheuncho. Somajik novsornni zaum-di Lhan Kristi Somudayancho kherit husko.
Firgoz Somajik Prexitayeche Manch (Parish Social Apostolate Fora) — hanche margdorxonnache kaide portun topasun, te fuddem veche mhunn odik nettan hanv ulo martam.
Amchim zaitim loukik bhav-bhoinnim goribicher zhuz manddunk jin’sam-jin’sanche upai ghetat; umedin tankam tenko diun, tanchi urba vaddounk ami sogllim fikirin vavrum-ia.

SOMAROP

Opurbayechea bhoinni-bhavamno, voir ami pollelam toxem, amchea Kristi bhavarthachi purai govaiki ami ditoleanv zalear, goribam khatir ami odik xitaben ani ghas gheun vavr korunk zai. Ho vavr amchea bhavarthak addecho nhoi punn mullacho. Povitr Atmeachi porob ami az somarombhtanv: Tachea bollan ani dhiran ami soglleamnim hea avhanak fuddo korcho mhunn hi Gonvllik Chitt tumkam hanvem kherit huskean boroilea.

Somazan bhairailoleank ani chepoiloleank amchea kallzamnim kherit zago korum-ia. Goribank ani konixttayek sampoddleant tanche sovem amchea veg-vegllea gonvllik kariavollimni husko dakhoum-ia.

Hea Gonvllik Vorsachi hi amchi kherit yevzonn mukhar vhorunk Ankvar Maria amchi sorginchi Avoi amchea jivitache yatrent amkam sangat korum. Ti durbollkayen jiyeli ani gorib mon’xam sodanch tichea kallzant aslim. Bhagivont Fransisk Xavier, Gõycho Patron, eke polasint zolmolo ani lhan-vhodd zalo khoro, punn amche modem yeun, gorib-dhaktteank kherit mogan tannem vengoilim ani tanche bhaxen ugteam pãyamnim bhonvlo. Bhagivont Juze Vaz, amchea Dhormprantacho Askari, to-i bi ugtea pãyamnim bhonvun, aplea kallzant goribancho, sonstoleancho ani vosadd poddloleancho husko asa mhunn tannem dakhoilem. Hea dogam vhodd Santanchea jivitachi sfurti gheun, ami-i aichea kallar Povitr Sobhechea huskeachim kalljidar hatiaram zaum-ia.

Hea sogllea kariant amcho Triek Dev – Bap, Put ani Povitr Atmo — tumcher axirvad ghalum mhunn magtam ani soglleank tumkam ek kurpevont Novem Gonvllik Voros anvddetam!

Arsebispachem Ghor, Ponnje, Gõy, Povitr Atmeachea Yenneachi Porob, Mayachi 20vi, 2018.

(+ Filipe Neri Ferrão)
Gõy – Damanvcho Arsebisp

Mottvim Rupam:

LG – Lumen Gentium, Dogmatic Constitution on the Church (1964)
LC – Libertatis Conscientia, Instruction on Christian Freedom and Liberation (1986)
JW – Justice in the World(1971 Synod of Bishops)
SDS – Statement of the Diocesan Synod(Goa 2002)
MD – Mulieris Dignitatem, John Paul II, Apostolic Letter (1988)
EG – Evangelii Gaudium, Pope Francis, Apostolic Exhortation (2013)
DPP – Diocesan Pastoral Plan (Archdiocese of Goa and Daman)
SRS – Sollicitudo Rei Socialis, John Paul II, Encyclical (1987)
YKJ 2000 – Yesu Krist Jayanti, National Assembly of the Church in India (Bangalore)