Pastoral Letter 2023 – 2024
CP-Past/134/2023
Gõy ani Damanv Mha-dhormprantachea Yadnikank, Dharmikank, Loukik Bhavarthiank ani Borea Monachea Mon’xank
GONVLLIK CHITT
“HANVEM TUMKAM KELAM TOXENCH TUMI-I KORAT” (Ju. 13:15)
Pritichea bhoinnim-bhavamno,
Seva gheunk nhoi punn seva korunk ailolea Somia Jezu Kristachi kurpa ani xanti tumkam somestank!
PROSTAVNA
Povitr Sobha Devachea bhurgeanchem kuttumb. Je bhaxen eka kuttumbak sopnam astat, tech bhaxen Povitr Sobhek-ui sopnam asat. Tisrea hozarveache Povitr Sobhechem sopon koslem kai? Ek ‘Porixodik Sobha’ zaupachem! Porixodik Sobha zavop mhollear loukik, dharmik ani yadniki vorgantleam soglleam vangddiamni, ekamekak hat diun, ekcharan ani sohobhageliponnan, Jezun dilolem misanv fuddem vhorop. Moniskulla borobor cholunk ani mon’xak novean Aplea mogachea ekcharant bhitor kaddunk Devachem sopon aslem. Heach khatir, Jezu Devacho Put monis zalo ani mon’xam modem jiyelo. Poilea xisank Aplo pattlav korunk apoitana, Jezun oxem mhollem: “Mhoje pattlean ieiat ani tumkam hanv mon’xank dhortat tosle kharvi kortolom” (Mk. 1: 17). Gel’lea Gonvllik Vorsa, hea vixoyacher ami khub nihall kela. Sogllem soddun, xis Jezucho pattlav kortat; Jezu borobor te bhonvtat; Jezuchi xikovnn te aikotat ani matxe-matxe korun pallunk xiktat; Jezucheo sobar milagri polleun, Devachi podvi te onnbhovtat. Sumar tin vorsam kel’lea aplea bhovxik vavra udexim, Jezu tankam ek novem kalliz ani ek novem mon diunk vavurta.
Aplea xisamni apnnaunk zai ti khaltikayechi ani seve-chakrechea fuddariponnachi xikovnn Aple dispott’tte jivitache dekhintlean Jezu xisank dita. Jezuchi novi xikovnn somzunk xisank avghodd zata ani, zaite pavtti, Jezu hea sonvsaracho Raza mhonn somzun, Tache rajvoddkent konnak poilo ani voilo zago mellttolo tache vixim tanche modem vadvidad zata (po. Lk. 22: 24; Mk. 10: 35-45). Nimannea Jevnnak boslole astana porian, ‘soglleam-von vhodd konn?’ hea prosnacher xisam modem bhasabas zali mhonn Xubhvortoman’kar Luk amkam sangta. Tea vellar, Aplea xisank khaltikayechea xegunna vixim xikoun, Jezu oxem mhonntta: “tumche modem konn vhoddlo asot to soglleam poros dhaktto zal’le porim zauncho; ani konn odhikari asot to chakor zal’le porim zauncho” (Lk. 22: 26; po. Mk. 10: 43-44).
Ji xikovnn Jezu Aplea xisank dita, ti To Apunnuch palltta. Nimannea Jevnnar astana, Apunn Deva thaun aila ani Deva-xim veta mhonn zanno zaun, Jezu jevnna velo utthtta, Aplem avoronn kaddtta, Aplea penkttak ek rumal bandta ani, eka tostant udok otun, Aplea xisanche To paim dhuta. Guru ani Somi zaun-ui eka chakracho vavr To korta. Xisanche paim dhuun zalea uprant, To tankam sangta: “Hanvem tumkam kelam toxench tumi-i korat” (Ju. 13: 15). Hea 2023-2024 Gonvllik Vorsant, Jezun dilole he adniacher ami nihall kortoleanv. Hi adnia dispott’ttea jivitant jiyeun, Bispanche Porixodeche Sollave Sadharonn Vixv Sobhek ani 2024-2025 vorsa amchea Gõy-Damanv Mha-Dhormprantant zaunchi asa tê Bhagevont Fransisk Xavierache Relikanche dakhovnnek ami sogllim toyar zanvchim.
1. SOMIA JEZUN KITEM KELEM?
Amchea Somian ani Gurun kelam toxench ami-i korunk, Tannem kitem kelem tachi thoddi-bhov vollokh ami ghetlear bori. Palestinachea ganvant gormi subez ani gormek lagun khub dhull. Vavra-dondeak vetoleanche paim dhullin bhortale, ani ghorant bhitor sorche adim te dhuunk, ghora mukhar udkan bhorlolem dhonn astalem. Durboll asat tim apunnuch aple paim dhutalint zalear, girestanger paim dhuunk chakor astalo. Jezu Aplea xisam borobor Nimannea Jevnnar aslo. Mezar bosloleanche paim dhuunk chakor naslo ani ekamekache paim dhuunk xisanchea monant legun yeunk na zatolem. Zhutt’tiank lagun tanche modem vadvivad zalolo dekhun, eka chakrachi kornni korun, aplea boroborcheam mukhar apnnakuch lhan korunk konnakuch khoxi nasli zaum-ye. Jezu hem bariksannen polleta ani Apunn, eka chakracho zago gheun, tanche paim dhuta!
Jezuchea kallar, eka guru ani tachea xisanchea sombonda vixim kaide ani porompora asleo. Eka gurun aple paim dhu mhonn aplea xisa lagim magunk zainaslem ani xis aple paim dhutolo mhonn khoincho-i guru ravonaslo. Ek guru aplea xisanche paim dhuta, hem tor chintunk pasun zainaslem! Heach sondorbant (context), Jezu xisank mhonntta: “Mhonnttoch, tumcho Somi ani Guru zaun-ui, Hanvem tumche paim dhule zalear, tumi-i ekamekache paim dhuunk zai” (Ju. 13: 14). Tanche paim dhuun, vhodd zaunchi vatt mogan kel’lem munniarponn, podvedar zaunchi vatt khaltikai, vhodd-vhodd zage ani man melloun gheupachi vatt seva, ani dusreancher odhikar choloupachi vatt aplench ap-dan korop mhonn Jezu Aplea xisank ani amkam-i xikounk sodta. Tor chakor kortale to vavr korun, manache ani podveche zage sodtolea Aplea xisank Jezu zata tanchi vatt.
1.1. Tannem Apnnakuch khali kelo, gulama-akar dhorlo
Bapa-xim vecho Aplo vell pavlo mhonn Jezu zanno aslo. Tacho vell lagim pavlolo ani heach khatir jem kitem Aplea xisank xikovchem aslem tem vegim-vegim Tannem xikounk zai aslem. Vell ibaddinastana, Jezu jevnna velo utthta ani Aplem avoronn kaddtta. Meza velo utthop ani avoronn kaddop kitem khunnaita? Sogllê rochneche soddvonne pasot, sorgincho voibhov sanddun, Jezun mon’xachem rup ghetlem ani lhan’vik-vinomr chakor To zalo tem khunnaita (po. Fil. 2: 6-8). Mon’xa rup gheun Devan Apnnakuch khali kelo; moniskullacho mog ani seva korun, Dev sevok zalo; ani sorv-xevttim, Jezu-Menddreachea omolik rogtan moniskullak dhuun kaddun, Devan Aplo xim’-mer naslolo mog dakhoilo. Ho soddvonnecho gutt Jezu xisanche paim dhuun spoxtt korta. Apunn konn ani khoim thaun aila tem Jezu zanno aslo. Bapan sogllem Aplea hatant dilam, Apunn Deva thaun aila ani Deva-xim veta mhonn To zannam (po. Ju. 13: 3). Deva thaun nipzol’lo Dev To; podven ani mhoimen bhorlolo. Podvedar Dev kirkoll mon’xam mukhar voddov ghalta ani tanche paim dhuta, Apli osoktai dakhounk nhoi, punn Apli podvi dakhounk. Jezu Aplea penkttak rumal bandta, eka tostant udok otoita, Aplea xisanche paim dhuta ani Apnnak bandlolo tea rumalak te pusta. Soddvonnechea vavra pasot Apunn Aplea Bapacho chakor ani eka chakra bhaxen sevek sodanch toyar ani aito mhonn Jezu dakhoita. “Moronn, khursachem moronn, Apnnacher ghei porian Devak To khalto zalo” (Fil. 2: 8).
1.2. Tannem Pedruche ani Judasache porian paim dhule
Dusmananchea moga vixim xikovnn diun, Jezun oxem sanglolem: “Tumcho mog korteleancho tumi mog korxat zalear, kosli tumkam mozuri mellot? Donddvosuldarui toxench korinant?” (Mt. 5: 46). Dusmanancho dves dhorunk nhoi, punn portench zalear, tancho odik mog korunk, Jezun Aplea xisank xikoilem (po. Lk. 6: 27-28; Mt. 5: 43-45). Hi Apli xikovnn, Nimannea Jevnnar, Jezu Apunnuch palltta. Aplo ghat gheuncho asa tea Judasa sovem Aplo xim’-mer naslolo mog eke nimanne pautti dakhoitolo mhonn tache paim dhuunk Jezu tache mukhar dimbi ghalta. Aple paim dhuunk Judas Jezuk addaina; Pedru bhaxen to Jezuk prosn-ui ghalina. Paim dhuunk to dita khoro, punn aplem kalliz mat dhuunk to dina. Heach khatir Jezu mhonntta: “soglle tumi nitoll nant” (Ju. 13: 11). Bhailean nitoll zala punn bhitorlean nitoll na toslea mon’xak Jezu vangdda kosloch vantto mellona (po. Mt. 23: 25; Ju. 13: 8); oslo monis aplench nisonnttonn korun gheta. Aple vatten, Pedru, aplem kirkollponn vhoddlean porgottun, Jezuk aple paim dhuunk mona korta. Pedruchi khaltikai ossol (genuine) nhoi mhonn Jezu zannam. Jezun taka nitoll korpachi goroz asa. Eka dusrea, odik molachea nhannachi khatri ghetlea uprant, Jezuk aple paim dhuunk diunk Pedru raji zata. Moro porian aplea Gurujicho mog korta toslo zaunk ani aplea Somiachio xellio rakhunk purto zatolo zalear, Pedrun, tea vellar Jezuchi seva manun gheunkuch zai. Oxem kelearuch, Jezun kelam toxem Pedru korunk pavtolo.
1.3. Aplim vostram ghalun, Jezu Aple svater portun ailo
Xisanche paim dhulea uprant, porot Aplim vostram ghalun Jezu Aple svater boslo. Sorgincho voibhov sanddun To ailolo; khursar morun soglleancho sopurnnayen Tannem mog korun dakhoilo ani punorjivont zaun, porot Bapachea uzveak To bosla. Sobd Deva sovem aslo; Sobd monis zaun dixtti poddlo; ani Bapachea gopant To asa (po. Ju. 1: 1-2, 14, 18). Novean Aplim vostram ghalop ani Aple svater vochun bosop, amche Soddvonnecho gutt ani sot khunnaita. Tache khaltikayek lagun, Devan Taka unch sorgar ubharun vhelo ani soglleam nanvam-von vortem Nanv Taka dilem (po. Fil. 2: 9).
2. JEZUCHEM FUDDARIPONN KOSLEM?
Xisanche paim dhulea uprant, Apnnem kitem kelam tachi somzonni ek-eklean apnnak zai toxi kaddunk Jezu dina, punn Apunnuch Aple kornniecho orth iskuttavun tankam sangta. Somzonni diunk suru kortana, Jezu xisanchi tokhnnai korta; tannim Apnnak Somi ani Guru koso apnnaila mhonn To manun gheta. Punn rokddench, Taka Somi ani Guru mhonn manun ghetat tanchi kitli vhodd zobabdari ti tankam spoxtt korta. Jivitachea sobhavantlean ani kornneamni Apnnem dakhoila to khalto ani teagi mog soglleam sovem tannim-i dakhounk zai mhonn To xikoita. Amchench chintop ani vagnnuk gheun, Jezuche xis amchean zaunk zaina. Jezuche xis zaunk, Somiachem ani Guruchem kalliz-mon ami apnnaunk zai. Hench monant dhorun, Jezuchê chal-vagnnukecher ani Tachea fuddariponnacher thoddo nihall korum-ia.
2.1. Jezu lokak sodunk veta toslo Fuddari
Jezuchea muniarponnacho maz mhollear monis. Konnakui Apnna sorxem yeunchi goroz asa zalear tannim yeunchem, oslem dhoronn gheun Jezun Aplo vavr korunk na; To Apunnuch mon’xank sodunk gelo. To mon’xanche sodik vetalo ani Apnnak sodunk yetoleank mogan ani khuxalkayen ghetalo. Ganv-ganvamni Jezu bhonvlo; ekach zagear To bosun ravunk na. Apunn bhonvtalo tea ganvamni ekui biradd Tannem Apnnak bandun dovrunk na. Lok vepar-dondo kortat thoim To gelo, devsthanamni xikovnn diunk To bhonvlo, lokachea ghoramni To tanche bhettek gelo, Xubhvortoman porgottit ani piddevontank borim korit ganv-ganvamni Tannem provas kelo (po. Lk. 9: 6). Aplench boreponn ani faido pollenastana, gorjek sampoddloleanchea adarak To pavlo. Thontteam ani kudd’ddeam, girestam ani durbollam, patkachea bhara khal cheploleam ani mon’xamni degek uddoiloleanche To sodik gelo. Aplea doyall-movall sobhava ani vagnnukentlean, mon’xanchim kallzam Tannem jikun ghetlim. Budhvontam toxench nennaram borobor To bhasabhas kortalo ani tanchea otmeanchi, monanchi ani kuddinchi porian bhuk-tan bhagoitalo.
Jezuchem fuddariponn porixodik fuddariponn; To mon’xam borobor chol’lo ani Aplea xisank-ui ekameka borobor cholunk Tannem xikoilem. Porixodik fuddari dusream borobor cholta, dusreanche gorjek-akantak pavta, sogllem bariksannen polleta, somzun gheta, soglleanchem aikota ani zannvayen aplim paulam marta.
2.2. Jezu khor avddin ani mogan Aplea misanvank khand martolo Fuddari
Khor avodd ani mog asa thoim xokti asa. Khoinchea-i vavrant khorem yes mellttolem zalear, ek khor avodd (passion) asunkunch zai. Zhoim xellmoddai bhitor sorta thoim misanvacho nett mòddtta. Ami mortokuch, amkam dilolem misanv kitle avddin ani mogan ami pall’lam tachoch ugddas mon’xanchea monant urtolo. Madar Teresan dublleam pasot aplem jivit bhettoilem; tichea pott-tiddken kel’lea vavracho sonvsarbhor lok azun porian ugddas korta. Bhagevont Damianvan koddkaranche sevent dakhoil’li khor avodd amchea ugddasant azun jivi asa. Aplem misanv kitem tem Jezu bhes-borem zanno aslo ani heach khatir Aplo bhovxik vavr suru kortana to oxem mhonntta: “Sorvesporacho Atmo mhojer asa, kiteak Tannem mhaka Obhixek kela: goribank Bori Khobor diunk, koidiank suttka porgottunk…” (Lk. 4: 18-19). Povitr Atmean Apnnak makhla, hi khatri Taka asli. Aplea Bapa sovem aslolo khol sombondh Jezuk Aplea misanvant dhir-boll zatalo.
Khor avddin ani mogan amchem misanv ami fuddem vhortoleanv zalear, Paulu bhaxen ami dor-eklean amchem kalliz bodlunk zai. Paulu bhaxen ami mhonnunk pavunk zai: “Konn-ui Kristachea ekvottant asat tor, tim ek novi rochnna; pornnem tem gelem, atam sogllench novem!” (2 Kor. 5: 17). Aplea Bapachi khuxi Aplem Misanv mhunn Jezu kednanch visrunk na. “Zannem Mhaka pattoila Tachi khuxi korunk ani Tachem kam sompadunk hench Mhojem khann-jevonn” (Ju. 4: 34). Soglleamni Tacho vavr manun gheunk na, zaiteamni Tachi kikont keli, Taka bhairailo, punn To niraxi zaunk na. Hem Aplem misanv xarti pavounk Apnnak koslo xevott ravta tem Jezu zanno aslo ani tea xevottak To toyar aslo (po. Ju. 7: 1; 8: 37). Aplea misanvancho mog aslole fuddari niraxi zainant, addkhollim modem legun apli umed soddinant. Oslea fuddarianchem sogllem dhean-mon aplea misanvancheruch asa ani misanva pasot aplo jiv legun diunk te toyar!
2.3. Jezu konnakuch bhairainastana, soglleank sangata gheun cholpi Fuddari
Mogachi bhaxa soglleank somzota; mon’xank Deva-xim oddun haddunk, Jezun mogache bhaxecho vapor kelo. Monis-jivachem vorteponn Tannem xikoilem ani soglleam mon’xank manan lekhlim. Tache-xim yeunk lokak bhirant disonasli. Tachea kallzachi movallai ani hanstem mukhamoll lokak Tache-xim oddun haddttalim. Kaide gorjeche, punn kaideam poros mon’xachi goroz odik mhotvachi mhonn Tannem xikoilem (po. Mk. 2: 27). Bhailem rup polleun ani dusreanchem aikun Tannem mon’xancher kednanch formonn marunk na. Pokxachem mon ani virodhi dhoronn gheun, dusreanchi ttika korche bodlek To borem korit ravlo. Apunnuch sotacho monis dekhun, konnachich ani koslich bhirant gheun To jiyeunk na. Somazant aslolea tore-torechea vegllocharank to boli poddunk na, kiteak soglleanche soddvonne pasot To ailolo. Nustem martoleank Aplo pattlav korunk Tannem apoile, donddvosuldaram borobor To jevnnak boslo, Judevank ani Judev nhoi tankam-i Apli kaklut dakhoili (po. Mk. 7: 24-30; Mt. 8: 5-13). Aplem muniarponn ani seva thoddeankuch nhoi, punn Devachea sogllea bhurgeank Tannem dili.
Aple mogache ubent soglleank bhitor kaddche khatir, mon’xank bhairaun dovortoleo kaim porompora legun bodlunk Jezu pattim ravlo na. Ek Guru eke baile lagim ani ek Judev eke Samariekarne lagim gozal korop, Jezuchea kallar chintunk pasun zainaslem. Judev lok Samariekarank lekhinasle. Jezu hi porompora bodolta. Koddkarank Apnnak lagim yeunk To dita ani tankam hat laun bore korta (po. Mt. 8: 1-4; Lk. 17: 11-19). Ek fuddari koso, Jezu mon’xam sovem aslolem boreponn polletalo. Lok Matevak ani Zakevak donddvosuldar ani patki koxe polletalo; Jezu tankam nanvan ulo korta ani tanger jevnnak vochun tankam Aple xis korta. Jezuchem fuddariponn bhairaupachem nhoi punn ekttaupachem; rag kaddpachem nhoi punn mog vistarpachem; boreankuch gheun vavurpachem nhoi punn patkiank deivik onnbhovachim sakxidaram korpachem.
2.4. Jezu novsornni haddpi ani jivit divpi Fuddari
Aplem misanv mon’xank jivit divpachem ani tem subham’ponnan divpachem mhonn Jezun porgottlem (po. Ju.10: 10). Patkachea bharantlim mekllim korun, mon’xank novem jivit Tannem dilem. Samariekarn ostoriek jivitachem udok diun, tichea nograchea loka-xim deivik onnbhovachi kalljidar govai Tannem tika keli. Novsornni haddpi ani jivit divpi fuddari mon’xank fuddaracho bhorvanso dita; osle fuddari mon’xachea vaitta vixim ani pattlea jivita vixim gozali korinant. Pordvarant sampoddlole bailek Jezu mhonntta: “Hanvui tuka atam guneanvkarnn mhonnona. Voch ani hea fuddem anink patok korum naka” (Ju. 8: 11). Simanv Pedruche nakarnne vixim Jezu tache lagim gozal korina, punn portench zalear taka vicharta: “Simanv, Juanvachea puta, Tum mhozo mog kortai?” (Ju. 21: 15-17). Ani Pedruchea mogachi khatri ghetoch, ek vhodd zobabdari tachea hatant ghalta. Aplea jivit ditolea fuddariponna vorvim Zakevak ani Matevak To nove monis korta. Khursar mortana, Jezuchem raiponn vollkhun ghetlolea chorak To mhonntta: “Hanv tuka khorench sangtam, aiz tum Mhojea sangata voinkuttant astoloi!” (Lk. 23: 43). Jivit divpi fuddari formonn marina, punn patok vollkhunk ani novem jivit suru korunk adar dita.
3. AMI KITEM KORUM-IA?
Bhoinni-bhavamno, Gõy-Damanvcho Mha-dhormprant Devachea denneamni bhorlolo. Amcheo firgozo kitleo jivall; kitlim loukik bhav-bhoinni Povitr Sobhechea misanvak umedin khand marun asat. Kitlim sondexkaram, xikxokam, Gonvllik Sobheche ani veg-vegllea sonvstanche vangddi bhavarth posraunk bhar ghetat. Amchea kuttumbamni avoi-bapui ani xapai-xamaim, aplea bhurgeank ani natrank Kristi bhavarthan ani xegunnanim vaddounk vavurtat. Jivan ani gunnamni bhorlolim amchim tornnattim ani bhurgim Povitr Sobhek girest kortat. Amchea Mha-dhormprantant kitle yadnik ani dharmikam mogan Devache porjechi seva kortat; gonvllik, xikxonnik toxem somajik mollar tim umedin vavurtat. Onath bhurgeanchê, zantteanche, dublleam-daktteanche sevent kaim zannam aplem jivit khorchitat. Amchea Mha-dhormprantant Kristachem misanv fuddem vhortana, loukikam, dharmikam ani yadnikam modem ekcharachem ani sohobhageliponnachem mon ani vagnnuk khub disun yeta. Nisvarthi monan kelolê tumche sevechi hanv tokhnnai kortam ani Devak argham ditam. Hea-i Gonvllik Vorsa, sangatim kelolea amchea gonvllik vavrak dixa ani nett diunk, kaim huske tumche mukhar hanv dovrunk sodtam.
3.1. Povitr Sobhechi novsornni
Povitr Sobhent Povitr Atmo vavurta, tika choloita ani novsorta.Kall bolandttam, Povitr Sobhechea chintpant, ticheam bandavollimni, poromporamni ani gonvllik upayamni novemponn yeunk zai. Oxem, tichem misanv fuddem vochunk zai. Jitli Povitr Sobha novi zata titli ti jivall zata ani jitli ti jivall zata titlem tichem misanv folladik zata. Novsornni na zalear, Povitr Sobha opangull zata, ti mhatari zata. Dor eka kallar, aplea apovnneak ani karyak visvaxi ravunk, Povitr Sobha novi zaunkuch zai.
3.1.1. Kaim vadvivadi mud’deam vixim amchem mon ami bodlunk zai; tech porim kaim mon’xam vixim amchi vagnnuk ami bodolchi goroz asa. Amchea firgozamni, dusrea prantantlim Katolk mon’xam ani kuttumbam asat. Tanche sodik vochun, tankam amchea firgoz-bandavollimni odik zago ami diunk zai. Xharirik divyang (physical disability) aslolea amchea bhav-bhoinnink zata te bhaxen amchea firgoz-bandavollimni zago diuncho mhonn mhojem magnnem. Kherit lingi zomeanchea bhav-bhonnim, logn zainastana borobor jiyetat, Povitr Sobhe thaun pois geleant ani ticher add vavurtat tanche sovem odik somjikayechim ani movall zaun, Jezu bhaxen zaum-ia.
3.1.2. Povitr Sobhechea dor eka vangddiak Povitr Atmean apnnak dilole vorgunn vaprunk firgoz ek yukt zago. Yadnikamni ani dharmikamni, loukik bhavarthianche gunn ani vorgunn manun gheun, Povitr Sobhechea vavrant tankam odik vantto diunk bhar gheuncho. Amchea firgozamni asloleo sonvstha, songotthna, zome ani lhan somudai Povitr Sobhek jivall kortat tem vollkhun gheun, tanchi vadd korunk ani tim fulounk vavrum-ia. Apapim vavurpachem mon soddun, soglleank sangata gheun Kristachem misanv fuddem vhorchem. Onathank, zantteank, vidvank ani durbollank amcho kherit husko dakhounche khatir, sogllea amchea firgozamni favo tosle zome ani ‘Borea Samaritanachi Nidhi’ ghoddun haddun, tanche sovem sevechim zaum-ia.
3.1.3. Jezu bhaxen ami seva kortoleanv zalear, Gonvlleamni kocherint bosun karbhar choloilear vo firgojent kariavolli ghoddun haddlear puro nhoi; dor eka firgozkarachea jivitant bhitor sorchi nibel goroz asa. Yadnikamni, dharmikamni ani loukik fuddareamni ghorabeank bhett diunk aplea gonvllik vavracho poilo ani voilo husko korcho mhonn hanv khotkhotean vinoitam. Povitr Sobhent khoinchea-i panvddear fuddariponn choloitat tannim Jezuchem mon ani vagnnuk apnnanvchi; amchea kallzachi doya-maya kednanch unni zaunchi nhoi; amche bhitor asloli misanvachi khor avodd ani umed xellmoddchim nhoi; dusreank kirkollavpachim ani khor okmanachim utram amchea tonddantlim bhair sorchim nhoi; dor eka mon’xak monisponnacho man diunk ami visorchem nhoi. Kaide poile nhoi, punn monis ani sombondh poile mhonn monant dhorchem. Soglle toreche bhed utrun, soglleam mon’xam thaim gonvllik husko dakhounk, kaim pavtti, amcheo bandavolli, porompora, chukichem chintop, Povitr Sobheche xikovnne vixim nennarponn, adi, addkholl zatat; teo bodlunk zannvayen paulam marun, Jezu bhaxen fuddari zaum-ia.
3.2. Amche sorbhonvtim asloleam sovem sonvad
Povitr Sobha somazant jiyeta ani, Jezu bhaxen, somazachi-i tinnem seva korunk zai. ‘Somaz vaitt’ — oslem chintop chukichem. Somazant aslolem boreponn, sogllea dhormamni aslolo sotacho uzvadd ani dhormanchea mon’xam modem aslolo sumell ami visrunk favo na. Sorkari mon’xam sovem ani somajik bandavollim sovem sonvad korop, hem Povitr Sobhechem karya. Oxem korun, somaz-novsornnechea vavrant ti aplo sohokar dita ani Jezu bhaxen somazachi seva korta.
3.2.1. Mhozo dhorm boro ani dusre dhorm chukiche, oslem chintop, Vatikan II Vixv Sobhe uprant bodol’lam. Sogllea dhormank manan lekhunk ani soglleam sovem aslolem boreponn polleunk, Povitr Sobha amkam ulo marta. Dusreanchi kikont korun, Xubhvortoman porgott korunk ami kednanch pavchinanv. Dusream sovem aslolem boreponn manun ghevop, hench Bore Khobreche porgottnechi survat. Sogllea dhormanchea mon’xank, dusrea sonskrutayank ani poromporank manan lekhun, Jezu bhaxen zaunk vavrum-ia.
3.2.2. Povitr Sobha ek virodhi pokx nhoi. Soglleam sorkaram borobor, soglleam somajik bandavollim borobor sonvad korun, somaz bhitorlea-bhitor novsorunk tinnem khomir zaunk zai. Gram Sabhechea zomatimni chukoinastana vantto gheun, amchea loukik bhav-bhoinnimni, apnnak odik lagu zatolea, somaz novsornnechea karyant vantto gheuncho mhonn ami ulo martanv. Somajik ani rajkaronnik vavrant misoll asloleam amchea Kristi bhavarthiamni, Jezun dakhoiloli sotachi ani nitichi vatt dhorchi mhonn mhoji vinonti. Oxem korun, Jezu sarkele fuddari ami zaunk pavtoleanv.
3.2.3. Dharmik, somajik ani xikxonnik mollar, soglleam chollvollink ani sonvsthank sangata gheun, novea somaza khatir Povitr Sobhen vavrunk zai. Sogllea borea monachea mon’xank sangata gheun, amchea vavrachea zagear, amchea xallamni, kocherimni ani veta thoinsor lhan mon’xall somudai ghoddun haddunk vavrum-ia. Oxem, Jezuchi mogachi adnia vevharant ghalunk ami pavtoleanv.
3.3. Devache Rochnechi niga
Laudato Si aple Chittint, Pap Saib Fransiskan Devache rochnecho samball korunk Povitr Sobhek ani akhkhea moniskullak ulo marla. Amchea Gõyant zaitim amchim loukik bhav-bhoinni poriavoronn rakhunk ani xrixtticho samball korunk vavurtat. Prithvi sogllea moniskullachi avoi ani tichi rakhonn korunk Povitr Sobhen sogllea mon’xank hat diun vavurchi goroz asa.
3.3.1. Mon’xamni kelolea produxonnak lagun, amchim xetam-bhattam, dongor, nodi, vello, pidd’ddear zait vetat. Tancho samball korunk amchea Kristi bhavarthiank ani sogllea borea monachea mon’xank hanv ulo martam. Rochnek vaitt korop ek patok mhonn zanniv gheum-ia ani amchoch faido polleun, rochnechem nisonnttonn korpachi tallnni poisaum-ia. Devache rochneche vorte rakhonddar zaunk vavrum-ia.
3.3.2. Amchea Gõy-Damanvchea Mha-dhormprantant, poriavoronn rakhun dovorche khatir dor eka Kristi bhavarthian apli-apli zobabdari pallchi mhonn vinonti kortam. Poriavoronn samballop thoddeanchench kam’ nhoi; ti ek chollvoll zaunk zai ani ami soglleamni amchem hat-bott ghalun, amchem sarvajanik ghor ami fuddle pillgek samballun dovrunk zai. Tor amche bhonvtonnche ani bhovxik zage nitoll samballun, Devan rochlole prithvechim vortim karbari ami zaunk pavtoleanv.
3.3.3. Pivpachem udok prithver unnem zait veta. Sonvsarant hozaramni lok nitoll udok mellona zaun, veg-vegllea piddank boli poddun morun veta. Toxench, eke vatten jevnna-khannacho khub ibadd zata zalear, dusre vatten durboll lok ani odik korun bhurgim jevonn mellona zaun mortat. Udkachem ani jevnnachem mhotv vollkhun gheum-ia ani ibadd korpachi tallnni poisaum-ia. Oxem korun, durbollanchi ani bhukek-tanek lagun vollvollttat tanchi seva ami korum-ia.
SOMAROP
Amchea Povitr Snana disa thaun, Devan amkam ulo marlolo asa: “Tumi-i mhojea molleant vochat ani hanv tumkam favo tem ditolom” (Mt. 20: 4). Aplea dakanchea molleant ami kelolê mogache seve khatir Devachi kosli mozuri amkam ravta kai? Jezun amkam sanglam: “zhoim Hanv asam, thoim Mhojim sevokam-i astolim. Konn-ui Mhoji seva kortat zalear, Mhozo Bap tankam man ditolo” (Ju. 12: 26). Ekamekachi seva dusre koslech axek lagun nhoi, punn sorgak amche dolle lavun, ami korunk zai. Somia Jezun keli tosli seva ami kortoleanv zalear ani Tache osle fuddari ami zatoleanv zalear, vhoddponnachem angvostr kaddun lhanvikayechi nhesonn ami ghalunk zai ani amchea penkttak rumal bandun, eka visvaxi chakra porim, sogllea mon’xanchi ani rochnnechi seva umedin ani mogan ami korit ravunk zai. Bhagevont Paulu porim, amchea kallzacho hetu hoch zaum-di: “Jezu Krista sovem voir sorgar inam jikhunk Dev amkam apoita: tem inam mhozo xevott” (Fil. 3: 14).
Bhagivont Fransisk Xavier ani amcho Askari Bhagivont Juze Vaz amkam seveche porzollit nomune. Bhagivont Juze Vazan, aplea jivachi porva korinastana, piddestanchi seva keli ani Xubhvortomanacho sevok to zalo. Bhagivont Fransisk Xavierachem kalliz Jezuchea mogan lastalem ani heach khatir desam-desamni vochun ani Xubhvortoman porgottpachea kamant aplo jiv zoroun to melo. 2024-2025 vorsa, tachea Relikanchi Dakhovnn zatoli. He mhotvache ghoddniek amchi otmik toyari korop bhov gorjechem. Osli toyari veg-vegllea panvddeamni — khasgi jivitant, kuttumbamni, somudayamni, firgozamni — nettan korchi mhonn ami Loukikank, Gonvlliank ani Dharmikank ulo martanv.
Anik eke mahan ghoddnniek ami toyar zatanv: 2023-2024 vorsa Vixv Povitr Sobhent zanvchi asa ti Bispanchi Porixod. He Porixodechi vatt choltana, Ankvar Mariek, Povitr Sobheche Avoik, amchea sangata gheum-ia. Tinnem mhollem: “Hi asam hanv Sorvesporachi chakorn…” (Lk. 1: 38). Devan apnnak dilolea misanvak xevott porian ti visvaxi ravli. Tiche vinnovnnen, “Hanvem tumkam kelam toxench tumi-i korat” oxem adnia dilolea Jezu sarkele sevok ami zaunk pavum.
Xevttim, Triek Devacho – Bapacho, Putacho ani Povitr Atmeacho – axirvad amam somestancher poddum mhonn magtam.
Arsebispachem Ghor, Ponnje, Gõy, Bhagivont Ankvar Marieche Elizabetik Bhettechi Porob, Mayachi 31vi, 2023.
Filipe Neri Kardial Ferrão
Gõy-Damanvcho Arsebisp