Congratulatory speech to Filipe Neri Cardinal Ferrao on behalf of Laity
Priticheam bhoinni-bhavamno,
Bhov Xrextt Filipe Neri Ferrao, amchea Arsebisp-Patriark Saibak, Pap Saib Francis-kan Kardial mhonn nomiarlo ani Kardialanche Mahasobhent bhitor kaddlo. Amkam Goykarank hi vhodd khoxechi ani obhimanachi gozal. Zori tor hea adim amche panch Goykar bhav Kardial zaleat, amchea Goy-Damanvchea Arsebispak poilech pautt Kardialachem dennem favo zalam.
Hea velar soglleam Goykaranchim kallzam sontosan bhorleant. Heach khoxealkayechea umalleanim bhorun, akh’khea Goy-Damanvchea loukik bhavartiancheam nanvan amchea Arsebispak, Filipe Neri Kardial Ferrao-ak, ami porbim ditanv. ‘Sorvespor Aplea mukhamolacho porzoll tumcher ghalum ani tumkam proson zaum’.
Arsebisp Filipe Neri Ferrao amchea Diocesan Centre for Lay Apostolate– Dhormprantik Loukikanchea Seve-Kendracho poilo Sonchalok. Taka loukik bhavartiancho bhorpur husko ani apurbai asa. Amchea dhormprantantlea loukik bhavartianchea veg-veglleam muniarponnank to ut’tejonn diit asa. Tannem Goy Damanvchi Povitr Sobha jivall ani povitr kela, hea tachea vavracho thoddkean ugddas kortam:
- Loukikank, Devachea Utracho mog lagunk ani kholayen somzonni mellunk “Jivitacho Prokas’ vo ‘Daily Flash’ him mhoinnealli pustika suru korunk tachich yevzonn.
- Soglleam figorzamni Gonvllik Firgoz Sobha (Parish Pastoral Council) aschi ani he sobhent, toxench Dhormprantik Gonvllik Sobhen (Diocesan Pastoral Council) nettan aplo gonvllik vavr korcho mhunn amchea Kardialacho mukheli anvddo.
- Amchem apostolic jivit okhondd ani poile Povitr Sobhechea jivitacho arso koso zaunk, amcheam firgozanim, Lhan Kristi Somudai odik jivall zaunche mhunn amcho Kardial bhor ghalta.
- Prot’tek vorsa, Gonvllik Chitt boroun, apleam xelliank lagu zatolea vixoyamcher nihall korunk ani Jezuchi xikovnn dispott’ttea jivitant vevharant ghalunk, amcho Arsebisp bharim vavurta.
- Bhavartheanchi otmik jivitachi vadd zaunk, ek sorv ut’tom ek’kantayechem ghor, St. Joseph Vas Spiritual Renewal Centre, amchea dhormprantak favo zalam zalear, tachich yevzonn ani karia.
- Borea Samaritanachi Nidhi (Good Samaritan Fund) dor eke firgojent sthapunk, ani durbollam ani gorjevontam pasot husko dakhounk, amcho Arsebisp pavla pavlan ugddas korta. Hea vorvim zaiteank, odik korun gel’lea don vorsank COVID mahamarichea kallar, adhar zala.
- Dusream prantantlim bhav-bhoinnink (migrants) hankam amchich bhav-bhoinnim koxim lekhunk ani Goy-Damanvche Kristi Sobhent misoll korunk, amchea Gonvllean amkam ulo marla ani pattimbo dila.
- Jezuchea vavrant soglleam loukikanim vanttekar zaunk, ani veg veglleam sonsthamnim (associations and movements) zoxe sondexkar, tornatte, vedisevok, charismatic group, xikovpi, dotor, norsi, tarvotti, seniors, vidva, adi, heam zomeam vorvim Kristi muleam ani vavr ximpddaun vechim, ani he toren ami sonvsarant khomir zaunchim mhunn, amchea Kardial Saibachem mon.
Goy-Damanchea dhormpranthant ami vixall torecho vavr polletanv. Hea bhair Arsbisp Filipe Neri Ferrao-achea buzancher atam kherit Kardialachi zobabdari asa. Amcho Gonvlli Bap, Vixv Povitr Sobhechea vavrant Pap Saibak lagxil’lean sohokar ditole. Hea munniarponnachi tankam porbim ditanam, apli zobabdari palltanam Povitr Atmeachi sfurti tankam ami magtam. Kardial Saibamno, ami, loukik bhavarthi, tumkam amchea magnneachem ani sakrifisachem otmik boll bhasaitanv. Devachi yevzonn tumche sovem xarti pavum, ani tumche vorvim amchi Goy-Damanvchi Sthanik Povitr Sobha bhavartachi, bhorvonxeachi ani mogachi vat dhorum mhunn amche khotkhotit otrek.