Hea vorsa(2026) Goychem Povitr-Pustokachem Kendran, Adlem-Goy, tanchea sonchalok Rev. Fr. Onasis Dcruz hanchea marg-dorxona khala, Goy-Damauchea Archdiocesachea dotonichea bhurgea-khatir, Povitr-Pustokacher ek kherit quiz ghoddun hadlo. Ho quiz, Povitr-Pustokachea Pentateuk-5 Pustokacher (Utpoti, Sutka, Levi-Xastr, Lokgonnti, Dusri-Somurt) adharit aslo. Quizachi toyari June-achea mhoineantlean suru zalli , ani toh maddun handdunk ek kherit somiti vinchun kadli. Tache vangddi zaun asle Rev. Fr. Onasis Dcruz, Rev. Fr. Ramiro Luis, Rev. Fr. Mryon Baretto, Ms. Amanda Crasto, Mr. Shuban De Souza, Mrs. Ivy Ferrao, Mrs. Jenicia Cardozo ani Mrs. Josma Pereira.
Quizacho Poilo panvddo sogllea firgozanim aplea firgojent, Julychea 12 tarker ghoddun haddlo. Hea panvddear zoit meloylolem firgojentlem ek bhurgem dusrea panvddear pavlem, zo ap-aplea varadhant tanchea vodhil- Iadnikanim Augustacher 12 tarker, ghodun hadlo. Uprant Tisro ani Nimanno panvddo, Diocesachea panvddear, Gonvllik Vidya-monddir, Adlem Goy, hanga Agustache 30 tarker, aslo. Hanga 19 bhurgeannim, Goyche 18 varadantlim ani 1 Damauchea missionatlim, tannim bhag ghetlo. Hea kherit somorombhache mukhel soire zaun asle, Rev. Fr. Marian Dacosta, Goy- Povitr-Pustokachea kendrache adle sonchalok. Toxench chod manache soire zaun asle, Rev. Fr. Joaquim Fernandes, SVD, Dhormik Episcopal vigar.
Survatek, sogllea bhurgeank, manan bhitor kadlim ani tankam tancheo suvato dileo. Tea uprant, Goychem Povitr-Pustokachem, Kendrachea sonchalokan , aplem ulovop korun soglleank ievkar dilo. Somorobhache sutr-sonchalak Mr. Shuban De Souza hannim kelem. Quiz suru korche poilim, Adlem-Goychea firgojechea ani Phondechea, Carm saibinichea kopelachea dotonichea bhurgeanni ek lhanxi karyavoll machyer sador keli ani sogllea quizant bhag ghetlolea bhurgeanche borea-magpeannim ani avoi-bapainnim toyar kello ek lhanso video soglea mukhar dovorlo. Video-che sompaddnek ek kherit sondex amka ani bhurgeank aslo toh dillo amchea Goy-Damauche Arch-diocesachea Bism Saib, Bhov. Manest Cardinal, Filip Neri Ferrao. Tannim sanglem ki him bhurgim hea panvddear pavop mhunllear amka soglleank ek vhod bhag ani Devachea utracho mog tumka asa hachi govaiki mhunun bhurgeank xabaski dili. Hea nimannea panvdeak tankam borem maglem ani tankam porbim diun, hea Povitr-pustokachi zannvai tumchea jivitachi novsornni zaunk diat mhunn tanche lagim maglem. Toxench Goy-Damauche Arch-diocesacho Adhari Bism Saib,Simiao Purificacao Fernandes, tannim bhurgeank, porbim dilim ani hea nimmanea panvddeank tankam borem maglem.
Vo, Quiz Rev. Fr. Ramiro Luis, tachea sangateam borobor, panch pavnddeanim bore toren mandlolo ani bore toren ghodun hadlo. Sogllea bhurgeanim apunn xinkleli Povitr-Pustokachi zannvai vapurli ani fuddakar ghetlo ani nimannem chear bhurgeannim zoit meloylem. Amche modem hea quizache zoit meloilolim bhurgim zaun aslim, Poile suvat meloili, Katherine Maria Victoria Rego, Povitr-Khursachi Firgoz Santa-Cruz, Ponje Varadantle, Dusri suvat, Neola Fernandes, Assumpta Saibinichem Kople, Guirim, Mapusa varadantle. Toxench, Tisre suvater ailo Ezekiel Mascarenhas, Penha De Franca Saibinichi firgoz, Aldona varad ani Chovti suvater aslo Joseph Agnelo Vaz, Povitr Ghoreabachi Firgoz, Adlem-Goy varad.
Quizachea akherek, Mukhel soire, Rev. Fr. Marianan, aplea ulovpantlean quizant bhag ghetlolea bhurgeank sondex dilo ki, he sondhik tumi fokot ek spordha koxi pollunk nakat va fokot Povitr-Pustokantlim navam, zage ani ghoddnio patt korunk vaprunk nakat, bogor, hea Povitr-Pustokachea zannvayecho porzoll tumchea , buddhicher, bhorvaxeancher ani kornneancher poddum di mhunn maglem.
Uprant, sogllea bhurgeank bokshis ani proma-potram vatllim. Nimanne, Mrs. Ivy Ferrao hannim, nimannem ulovop korun soglleanche abhar manle.
Him zoit meloylolim bhurgim atam Goy-Damauchea Arch-diocesiche vatin, Janerache 24 tarker 2027 vorsa, Bharatachea Poschim- Vattarachea ier Archdiocesa borabor sort kortolim.
Hea bhaxen hea dioceseche panvddear ghoddun hadlelea Povitr-Pustokachea, quizan amchea bhurgeank, Povitr-Pustokachea mogan lhasunk mukhar kaddlim. Toxench Devachea-Utra vorvim, vhodlea promannant purai Goy-Damau chi Archdioce, ek famil koxi ekttaim aili ani Povitr-Atmeachea bollan ani kurpen bhoron vo somoromb ghoddhun ailo.
– Ms. Nikita mendes
Dev-Sondexkar
Bhag. Annachi Firgoz, Ponda
