KONKNNI VACHPA SPORDHA – CAMURLIM-CHEA GANVANT
Bardez-chea Camurlim-che Firgojent, Cascia-che Bhagivont Rita-ache Igorjen, Dalgado Konknni Akademi-chea zodd palvan, September-ache 9ver, Son’vara disa, sanjechea 4.00 te 6.00 vazta meren Bhagivont Rita-che Igorjent, Konknni Vachpa Spordha ghoddun haddli.
Hi vachpa spordha bhurgeanche ani vaddloleanche oxea don vibhagamni zal’li. Bhurgeanchea vibhagant dha bhurgeamni ani vaddloleanchea vibhangant otthra zannamni vantto ghetil’lo. Survatek Igorjechea Padr Vigaran Pri. Roman Rodrigues hannem zomloleank yeukar diun, spordhek survat dili.
Spordheche porikxonn bab Vishal Khandeparkar ani bab Celso Fernandes-an kelem. Spordha somptokuch zoitivontank inam’am bhettoilim; bhurgeanchea vibhagant, Emmanuel Fernandes, Malka Fernandes ani Sela Noronha hankam kroman poilem, dusrem ani tisrem inam favo zalem zalear, vaddloleanchea vibhagant Ivo Monteiro, Leah Santamaria ani Jose D’souza hankam kroman poilem, dusrem ani tisrem inam favlem. Toxench Gretta Sequiera ani Ruth Fernandes hankam umed vaddoupi inam’am bhettoilim. Sogllea vanttekarank promannpotram bhettoilea uprant, Dalgado Konknni Akademi-chea odheokxan Xri. Vincy bab Quadros-an soglleank dhin’vasle.
CAMTROXEL
September-ache 25ver, Aitara disa, sanjechea 4.00 vorancher, Cascia-che Bhagivont Rita-che Igorjent, Camtroxel ho tornatteancho kariakrom ghoddoun haddil’lo.
Hea kariakromant Camurlim, Tropa ani Oxel hea Firgojechea tornatteamni ektthaim yeun ho dis monoilo. Magnneam ritintlean survat korun, “sonvsarak uzvadd zaunk” sondex ghetlo. Tea uprant Dhormprantik Tornatteanchea Kendr-acho sonchalok Pri. Savio D’Souza, hannem aplea onnbhovachea bhanddarantlean, “amchea jivitak hetu asa” mhonn tornatteank sondex dilo.
Cheav zaun visov ghetoch khell khellun uril’lo vell tornatteamni moujen sarlo. Dor ek khell dhormik totvacher ani Povitr Pustokachea vachpancher ghoddoun haddil’lo. Dor eka khella poilim, Povitr Pustokantlo utaro vachun, tacher thoddo niall korun ani sondex gheun dor ek khell khellop zalem. Xevottak Pri. Peter Simon-an soglleank inam’am bhettoilim ani Pri. Roman Rodrigues-an zomloleank Dhin’vaslea uprant, kariakrom xevottak pavlo. Enverne Lobo, Rose Fernandes ani Giselle Fernandes, hea tornatteamni kariakrom-achem ayojon kelem.