Legio Mariae hi sonstha sthaplear 104 vorsam zali ani aiz meren hi sonstha Bhagevont Ankvar Mariaechea fuddariponna khal boro vaur korit asa. Lejianvacho mullavi fantto mhunge ‘Praesidium’ hacho karbar 4 Odhikari choloitat: Odheox, Up-odheox, Chittnis ani Bhanddari. Lejianvache nem’ ani kaide zaun asat tiche okhondd khambe (pillars) ani he khambe thir dovrunk Lejianvache Odhikari thokos gheun vavurtat ani hench monan dovrun dor vorsa August-achea dusrea aitarak Raia Comitium Odhikareamcho Dis monoita. Hea vorsak Utsovik Voros monan dovrun, Lejianvachea Odhikareamcho Utsov (Jubilee of Legion of Mary Officers) somorombhunk August-ache 10 tarker sokallchea 11:30 vaztam Raia Igorjechea Sobhaghorant Raia Comitium-a khal aslole Lejianvache Odhikari ekttaim zale. Odhikareank kherit xikvonn diunche khatir ail’le Legionar Bhav Agnelo Luzerio Fernandes (Agnelo de Borim). Tannim aple xikovnnent ugddas kelo: Jezun Bhagevont Pedruk mhunnlolem, “Tum mhozo mog kortai zalear, Mhojea xelliank chorvak vhor”. Aiz Jezu dor eka Lejianvachea Odhikareank-ui mhunnta, Tum Mhozo mog korta zalear Mhojea xelliank chorvak vhor. Dekhun hi Lejianvachi sonstha fuddem vortana nem’ ani kaide pallun Lejianvancho fantto sthapla tea ganvche porjek Atmik vatten vhorunk ami tea ganvchea lokha pasot vavrunk zai mhunn sondex dilo. Xevottak dor eka Lejianvachea Odhikareak ‘Jubilee Cross key chain’ ek bhett koxi diun, bhorvanxeache yatrekaram zaun Lejianvacho vaur korunk ulo korun ho somorombh sompoilo.
Stefan Dias,
Secretary,
Povitr Sobhechi Avoi Raia Comitium
